Nakapagtala ng kabuuang P6.57 milyon na benta ang mga lumahok na MSMEs sa katatapos na 5th CARP Regional Trade Fair ng Department of Trade and Industry (DTI) sa Central Luzon.

Ayon sa ulat ng PIA-3, nasa humigit-kumulang 102 micro, small, and medium enterprises na pawang mga benepisyaryo ng Comprehensive Agrarian Reform Program (CARP) ng gobyerno, ang nakilahok sa aktibidad na ginanap sa Marque Mall sa Angeles City.

Ayon kay DTI Regional Director Leonila Baluyut, ang halagang ito ay higit sa doble sa target na benta na naka-peg sa P3.24 milyon.

“Ang pagpapagaan ng mga protocol sa kalusugan at ang pagpasok ng Christmas season ay maaaring nag-ambag sa mga positibong numero ng benta na higit pa sa doble sa kabuuang benta mula noong nakaraang taon. Ang naitalang benta ay nangangahulugan na ang mga mamimili ay nakakakuha ng higit na kumpiyansa na bumili ng mga lokal na produkto habang ang ekonomiya ay bumabawi,” ayon pa kay RD Baluyut.

Sa kabuuang benta, P2.9 milyon ay mula sa cash sales; P2.1 milyon mula sa mga naka-book na benta; at isa pang P1.4 milyong benta na nasa negosasyon.

Ipinakita rin sa datos na ang Pampanga ang nakakuha ng pinakamataas na benta sa pitong lalawigan na may P3.76 milyon. Sinundan ito ng Nueva Ecija na may P717,383; Bataan – P521,981; Tarlac—P450,246; Zambales—P430,439; Bulacan—P351,104; at Aurora—P326,750.

Bukod sa marketing sa pamamagitan ng trade fairs at market matching, patuloy na sinusuportahan ng DTI ang livelihood component ng agrarian reform program ng gobyerno.

Ang ahensya ay nagbibigay ng pagsasanay sa mga kasanayan, pagbuo ng produkto, mga pasilidad ng shared service, at iba pang tulong na pang negosyo.

The post MSMEs kumita ng P6.5M sa trade fair appeared first on 1Bataan.